TE KĀHUI RŌIA
Ihipera Peters
(Ngāi Te Hapū, Waitaha, Ngāti Awa, Ngāti Rangiwewehi, Hāmoa)
Tumu Whakarae | Director
Whai muri i tana putanga ā ihu i Te Whare Wānanga o Tāmaki Makaurau i te tau 2009 me āna tohu paetahi i roto i te Ture me te Toi, i uru atu a Ihipera ki te kāhui rōia o Aotearoa i te tau 2010.
Kua whakawhānuitia te puna wheako a Ihipera i roto i āna mahi, pērā i ngā ture take Māori, te ture pakihi, te ture hoko whare, te ture tarati, te ture ōhāki anō hoki. Kua whakakanohi ai e Ihipera i āna kiritaki i mua i Te Rōpū Whakamana i te Tiriti o Waitangi, te Kōti Whenua Māori, te Kōti ā-Rohe, te Kōti Teitei me te Kōti Pīra.
E kaha ana a Ihipera ki te mahi ngātahi hei arahi, hei pūrangiaho, hei whakamanahia i ōna kiritaki kia kōwhiri te huarahi hei whai rongoā mō a rātou ake take i roto i te ao ture.
He Tumuaki Wahine o mua o Te Rākau Ture a Ihipera, ā, i mua ake i tana ruku atu ki te ao ture, i mahi ia i roto i te tūranga Pouāwhina Māori i te Kura Ture o Te Whare Wānanga o Tāmaki Makaurau. He mema a Ihipera o Te Hunga Rōia Māori o Aotearoa (The Māori Law Society) me te Hunga Rōia o Te Moana-nui-a-Kiwa (Pacific Lawyers Association).
He kōrero Māori, he kōrero reo Hāmoa anō hoki tā Ihipera. E ngākau nui ana ia ki tana whāinga matua, kia maori ai Te Reo i roto i ngā wāhanga katoa o te ao ture i Aotearoa nei.
I waho o te tari, e ngākau nui ana a Ihipera me tona hoa rangatira a Carl ki a rāua tamariki tokowhā, ā, he mahi pārekareka ki a rātou ko te hau atu ki te moana, ki ngā awa, me te whakatōmene i ngā āhuatanga katoa o te taiao.
021 2120627
Aroha Herewini
(Ngāpuhi, Ngāti Rēhia, Ngāti Kuri, Ngāti Hau, Ngāti Kaharau)
Rōia Matua | Senior Solicitor
Tākiri mai te ata
Korihi ngā manu
Ka ao, ka ao
Ka awatea
Tīhei mauri ora
Katahi anō a Aroha ka kuhu mai ki a Kaupare Law i te tau 2021 hei rōia matua. I whakapōtaetia e ia ki te tohu paitahi i roto i te Ture me te Toi (BA/LLB) i te tau 2015 mai i te Whare Wānanga o Tāmaki Makaurau. Nā tāna tono hei roia o Aotearoa i te tau 2016, ka ruku tōtika a Aroha ki āna mahi hei roia Māori i te Tari Ture Hāpori Māori o Waitematā, ki reira mahi tahi ai ia ki te rōpū Kaupapa Māori e āwhina ana i te hunga Māori o te
Waitematā. Ko te hono atu ki ngā tāngata, ngā rōpū maha me ngā kura o te rohe me te noho ki te pae tautoko o te Kōti Rangatahi ki Hoani Waititi Marae ētahi o āna mahi nōnā i reira. Mai rā anō, ko ōna wheako ā ture nei he roia mō ngā whānau, hapū, rōpū Māori nōki puta noa i Aotearoa i te Kooti Whenua Māori me Te Taraipiunara o Waitangi. He wheako hoki ōna ki ngā ture-ā-mahi, te ture whakawhitinga, ngā ture e hāngai ana ki te putunga rawa me ētahi take pakihi. Ko tana pai tawhiti ki rō ēnei mahi ko te whakawaha me te whakatutuki i ngā hiahia o āna kiritaki i runga i te tika me te pono.
He mema a Aroha o Te Hunga Rōia Māori o Aotearoa (The Māori Law Society), he tumuaki o mua o Te Rākau Ture (Māori Law Students Association) nōki. Nā, ka noho ko tana tuakiri Māori me ngā mea katoa o te Ao Māori te tūāpapa me te kaiārahi o āna mahi katoa. Ka mutu, he whāinga nui tō Aroha ki te whakaaweawe i te reanga hou kia whakapono atu ki a rātou anō, kia whakawhirinaki atu ki ngā hua o te ao Māori nōki hei oranga mō rātou.
Hāunga i te mahi, e ngākau nui ana a Aroha ki tōna whānau, ki tōna hapū me te pārekareka o ngā mahi o te taiao pērā i te eke maunga me te haere ki te moana. E arohanuitia ana e ia ki ōna hoa, ā, ko te whakawhanaungatanga te mea matua.
021 02416212