Ā MĀTOU RATONGA
He mātanga mātou ki te whakamahi i te ture kia hua mai ai he painga mō ā mātou kiritaki. Mai i te marae mō ngā nohoanga o Te Rōpū Whakamana i te Tiriti, ki ngā Kōti, ki hea atu raini, ko ā mātou kiritaki ērā kei te tihi o ngā whakaaro.
We have vast experiences in differing areas of the law and have a proven success record that shows we use this experience to provide the desired outcomes for our clients. Whether that be in the marae for Waitangi Tribunal hearings, in the Courts or other places that the law and tikanga may take us, our clients needs are at the forefront of everything we do.
Te Rōpū Whakamana i Te Tiriti o Waitangi | Waitangi Tribunal
Toitu te whenua, whatungarongaro te tangata
Ka whakakanohi mātou i ngā kaikerēme huhua kua whakatakotohia ai ā rātou kerēme ki mua i te Taraipiunara. E whakapono ana mātou ki ngā atikara o Te Tiriti o Waitangi, ki ōna mātāpono ka mutu, ki ngā whakaaro o ō mātou tupuna i hainatia ai Te Tiriti o Waitangi i te tau 1840. He mea nui ki a Kaupare Law ngā kī taurangi i puta i Te Tiriti o Waitangi me te whakatau kia mau tonu te Māori ki tōna tino rangatiratanga.
Te Kōti Whenua Māori | Māori Land Court
Toi tū te kupu, toi tū te mana, toi tū te whenua
E whakapono ana a Kaupare Law ki te kōrero, “Ko te Kōti mō te iwi Māori tēnei”, koina mātou e kaha nei ki te whakatinana i aua kupu, ki te hāpai i ngā tikanga i roto tonu i ngā nohoanga o te Kōti, ki te kōrero i te reo Māori ki ōna toronga katoa, me te aha ka eke panuku, ka eke tangaroa hei Kōti mō te iwi Māori.
Whakawhiti Kōrero Take ā-Tiriti | Te Tiriti Negotiations and Settlement
E mua kaikai, e muri kai huare
He whēako ā mātou ki ngā mahi i te ao o te Whakataunga Take Tiriti. Ka mahi tahi me te Kāwanatanga ki te whai i te huarahi e tika ana mā ngā Rōpū Mana Kōkiri. Mai i te timatanga o tēnei tukanga tae noa ki tōna whakamutunga. Ka āwhina mātou ki a rātou ki te hanga i ngā tono, ā rātou rautaki, ka mutu, ka tuku kupu tohutohu ki a rātou me pēhea te whai i ngā tukanga ki te whiwhi whakaaetanga mō tā rātou rōpū, ki te uru tika atu ki ngā kōrero whakawhitiwhiti me te Kāwanatanga.
Ture ā-Taiao | Environmental Law
Ahakoa iti, he pounamu.
Ko Papatūānuku e takoto nei, ko Ranginui e tū iho nei, ko tō tātou taiao kei waenganui. Hei tā Kaupare Law whakapono, he whakapapa tō te taiao, he whakapapa tuku iho nā te wehenga o Ranginui rāua ko Papatūānuku. He wairua, he mauri anō hoki tō ngā mea katoa e tupu ake nei ki raro o tōna maru, ehara i te mea he rawa noa iho. Ko tā mātou me te iwi Māori mahi, he tiaki, he manaaki i tōna ake oranga. Ka whakamahi mātou i te ture ki te tohu i te ara tika hei whai mā ā mātou kiritaki kia pai ai tā rātou mahi ngātahi me te Kāwanatanga me ērā atu tāngata kia ora ai te taio.
Ture ā-Marea| Public Law
Ko te pae tawhiti, whāia kia tata, ko te pae tata, whakamaua kia tina
He nui ā mātou wheako me ō mātou mātauranga ki tēnei ao. E mōhio ana mātou i ngā pekanga o te Kāwanatanga me te hirahiratanga kia whai wāhi te Māori ki ēnei wāhanga katoa. He rite tonu tā mātou wero i te hinengaro o te Kāwanatanga kia aro tuturu ki te Māori i runga anō i ngā mātāpono o te houruatanga, te mahi ngatahi me te whakaaro ake, e mau tonu ana te Māori ki tōna rangatiratanga.
Ture ā-Mahi | Employment Law
Ehara taku toa i te toa takitahi, he toa takitini kē
He mātanga ō mātou ki te ao o te ture ā-mahi. Ka tuku atu mātou i ngā kupu tohutohu ki ngā kaimahi me ngā kaiwhakawhiwhi mahi, e tohu nei hoki, e whakakanohi nei hoki i ngā tari, i ngā kamupene e kimi ana i te ara tika ki te whakatau i tā rātou take ture ā-mahi. He pūkenga rau o mātou tāngata mō te whakawhiti kōrero, mō te whakatau hoki i ngā take, ka mutu, ki te pūmau i ngā mātāpono, i ngā tikanga i taua wā tonu.
Ture Whakawhitinga me ngā Wira | Conveyancing and Wills
Mate atu he tētēkura, ara mai anō he tētēkura
Pēnā e kimi ana koe i tētahi rōia mō tō take hoko whare, e hiahia ana hoki koe ki te whakarite he wira, kei a mātou ērā wheako, tēnā whakapā mai.
Ture Tauhokohoko | Commercial Law
He manako te koura i kore ai
He wheako ā mātou ki ngā wāhanga o te ture tauhokohoko. Kua tū mātou hei rōia mō ngā whakawhitinga tauhokohoko, nā konā, i wāia haere tā mātou mōhiotanga ki te tuku i ngā kupu tohutohu e hāngai ana ki ngā kirimana, ngā whakaaetanga, ngā tukanga kia whakatū kamupene me te waihanga i ngā Pukapuka Taratī. i whakakanohi hoki mātou i ētahi kiritaki ki te whakatū i ngā Taratī whai muri mai i ngā kēhi nui i te Kōti Teitei.